انا اسف اني بغرد في سرب آخر، بس الصراحه في بعض الناس المجهولة الي شاطره اوي في شغلها وعامله حاجه محترمه جدا في مجال الميديا، وهما راديو MIX FM 87.8 ، ناس مش بيعملوا اعلانات خالص، ولا بيجيبوا مذيعين يتكلموا، ولا في اي وسيلة تواصل بشريه ممكن تحقق ارباح
مفيش اعلانات خالص لمحطة بقالها كتير، مفيش شخص بيكلمك ويقولك ابعتولنا على كذا عشان تعبر عن اعجابك وتقولهم "انا بحبكم اوي"
ذوقهم ذكي جدا في المزيكا في كل الاوقات المختلفه، في هدوء الليل في بعض الاحيان لما تسوق في وسط سكون الاخرين وشعور الوحده تلاقي بلاي ليست بلوز هادية شغاله معاك كخلفية لسواقتك ووحدتك بتطلع مشهد سينمائي خالص وانت ماشي على محور المشير طنطاوي
في بعض الصباحات الباكرة الي مضطر تروح فيها مشوار وقافل ازازك من من السقعه ولتحصل على بعض هدوء الاصوات في السادسه صباحا بيشغلوا فيروز بأغاني هاديه، حينما تشتد الشوارع زحاما او ضجيجا بتلاقي بلاي ليست تانيه ليست هادية كفيروز ولكنها ليست صاخبة لكنها تهون عليك ضجيج المشوار صوتا وزحمة
مجهولين شغالين من وراء اجهزه محدش يعرفهم، مفيش مصدر دخل زياده بيخش الراديو من الاعلانات، محدش يعرف اساميهم لانهم يبقوا نجوم لامعين ياخدو الvaldiation من الناس في الشارع
كان لازم اوجهلكم شكر انكم اذاعتي المفضله على الراديو، كان نفسي تبقوا موجودين على النت عشان اسمعكم وانا مش في مشوار
شكرا للي بيبذل مجهود وبينقي playlist بعناية شديده جدا،
شكرا للي بيعرف يظبط المود بشكل وتناسبه مع عقارب الساعه بدقة شديدة،
شكرا للي اختار انه ميبقاش في برامج ولا يبقى في اعلانات (ولو اني مش عارف هتكسبوا ازاي محتاج اعرف ده فعلا اتمنى لو اعرف ا supportـتكم)
شكرا اني بحس انكم مش مستنيين مني حاجه ولا عايزين مني حاجه غير انكم تعملوا شغل حلو وبسيط وجميل
اتمنى اي حد شغال او يعرف حد شغال في المحطة يوصله احترامي وتقديري وحبي واعجابي
Comments
Post a Comment